Oarsoaldeko Kalapiek txalotu egin nahi ditu ingurugiroaren alorrean Carrefourrek egin dituen aurrerapausoak. Harekin bat eginez, adore eman nahi diogu bidegorri bat egitea bultzatu dezan Errenteria-Orereta eta Oiartzun artean, bi herrien komunikazioa hobetzeko balioko bailuke.
Oarsoaldeko Kalapiek begi onez ikusten du Carrefourrek egindako ahalegina jendearen artean ingurugiroa babesteko jarrera zabaltzeko, horren erakusgarri da plastikozko poltsak doan banatzeari uztea, horrela hondakinen kopurua eta petrolioarekiko mendekotasuna murriztuko baitira.
Bide horretan beste aurrerapauso bat ematera gonbidatu nahi dugu Carrefour: eskualdeko herritarrak saltokiraino bizikletaz joan daitezen balioko lukeen bidegorri bat eraikitzera, Alcampo-Mamutek dagoeneko egina duen bezala.
Hori dela eta Kalapiek dei egiten die Gipuzkoako Diputazioari, Oiartzungo eta Errenteria-Oreretako Udalei, eta Leroy-Merlin, Brihogar eta Afederi elkarlana egin dezaten bidegorri hori laster errealitate izan dadin, bidegorria egokia izango delakoan motorrezko ibilgailuetan egiten den mugikortasunak sortzen dituen kalteak murrizteko: kutsadura akustikoa, eguratsaren kutsadura, lurraren okupazioa…; gaur egun gehiegizko erabilera duen automobil pribatua pixkanaka gutxiago erabili dezagun.
Oiartzunen, 2009ko irailaren 19an
Fernando Bengoetxea
Oarsoaldeko Kalapie Elkartea
