Kalapie hiriko txirrindularien elkartetik gure iritzia modu publikoan agertu nahi dugu Alderdi Ederreko bidegorriari buruz eta bide horrek Bulebarrarekin bat egiten duen guneari dagokionez Donostiako alkateak aukeran eman dituen ibilbideei buruz.
1. Andia kalea Hernani kalearekin gurutzatzen den eremutik Bulebarrerainoko tarte horretan aukerarik egokiena izango litzateke bidegorria Alderdi Ederren alboan jartzea, Hernani kalearen aldetik.
2. Udal Liburutegiaren ondoan bidea estutu egiten da, horrek arazoak sortu ohi ditu eta arazoak konponbidea eskatzen du. Gure ustez, soluzio egokiena semaforo bidez etorri liteke, ibilgailuei pasatzeko aukera txandaka emango lieketen semaforoen bidez, lehentasuna oinezkoei, txirrindulariei eta garraio publikoari emanez, automobilen eta motoen aurretik; Mugikortasunaren Hitzarmenean adostuta eta onartuta dagoen moduan.
3. Bulebarrean oinezko asko ibiltzen da ia beti. Horrek elkarbizitza arazoak sortu ohi ditu oinezkoen eta ziklisten artean. Arazo horri dagokienez, lehen ere askotan adierazi izan dugun bezala, konponbiderik onena izango litzateke aparteko bidegorri bat jartzea Bulebarreko etxeen ondoan, hegoaldeko aldean, Legazpi kaleraino iritsi arte. Gune horretatik aurrera, bidegorriak Bretxa aldera joko luke, Erregina Erregentearen kalean dagoenarekin lotzeko.
