Hiri Txirrindularien Elkarte den Kalapiek jendaurrean bere poza agertu nahi du Boulevardeko bidegorriari ematen zaion irtenbidearen berria dela eta. Bukatutakoan, Erregina Erregeorde kalean zegoen bidegorriak luzapena izango du Bretxa aldera, eta Legazpi kaleko bidegurutzetik aurrera, Boulevardeko ezker erreiatik jarraituko du Hernani kaleraino.
Gure ustez horren bidez konponketa ona emango zaie Boulevardean izaten diren txirrindularien eta oinezkoen arteko bizikidetza arazoei, izan ere oso jendetza handiak biltzen baitira bertan, bai oinez eta bai bizikletaz.
Era berean, irtenbide horrek hobekuntza handia ekarriko dio Grosetik abiatuz Erdialdera eta Antigua auzora doan bizikleta-trafiko ugariari, ibilbide zuzenago eta erosoagoa eskainiz, oinezkoi kalterik sortu gabe.
Zorionak eman nahi dizkiogu Donostiako Udalari hiritarren eskari honi erantzuteagatik; zalantzarik gabe bizikletazaleen ibiltze-baldintzak hobetu egingo dira, eta baita Boulevard aldeko oinezko esparruen kalitatea.
